分享至
（原标题：笑星黄俊英）
“肥仔米肥仔米，瘦仔食佐变肥仔，肥仔食佐变傻仔。”听到呢句搞笑金句，你有冇谂起系边个讲嘅呢？喺好多70后或更早嘅广州人印象中，佢同星爷嘅“烧鸡翼”一样熟悉，佢就广州本土嘅笑星黄俊英。新闻话，黄俊英从艺65周年专题晚会将喺8月12日举行，仲会喺晚会上设一个特别嘅收徒仪式添。
记得上世纪八九十年代，系黄俊英最红嘅时候，打开电视，有佢出现嘅节目，街坊必定中意。当年广东台每逢周末，都有一档粤剧小品节目，里边不时有黄俊英、何宝文、卢海潮做主角，里面有好多盏鬼表演，成咗本地观众晚饭后消闲嘅首选。嗰阵时，娱乐节目唔似今日咁丰富，一到佢哋出场，街坊都会担凳仔坐喺电视机前边，一边睇一边笑。黄俊英表演嘅《三六九查户口》、《肥仔米》、《盲公问米》等粤语小品，同卢海潮合唱嘅新编粤曲小调《大排档小唱》，到家阵仲耳熟能详。
呢啲表演，观众点解中意？原因不外乎三个字：接地气。素材都来源于日常生活，角色就好似隔离屋阿伯咁亲切。黄俊英嘅表演，仲融合咗相声、粤剧、小品呢啲元素，既有艺术，亦够通俗，男女老幼，不论知识水平如何，都啱睇。尽管今时今日，娱乐节目相当丰富，但呢样嘢仍然值得如今嘅表演艺术借鉴。
闻歌 媒体人
本文来源：信息时报
责任编辑：
王晓易_NE0011
