(原标题:拉头缆)
白话广州
“我哋好耐冇搞过校友聚会,不如今次你拉头缆啦!”喺一家大学度,几个后生仔倾计,商量校友聚会嘅事。家阵,每逢节假日,好多街坊都习惯同学朋友聚下会,搞下活动,负责牵头组织嘅人,就叫“拉头缆”。
拉头缆,又或者叫扯大缆,呢个词带住浓浓嘅广府水乡嘅气息。旧阵时,无论广州珠江两岸,定系珠三角水乡,啲船只煤、油、电之类嘅动力唔够时,行船(尤其系逆水时)有时仲要靠啲纤夫喺岸上扯缆。带头嘅人最重要,佢指引住行船嘅方向、力度,所以后尾广州人就将嗰个带头嘅角色,叫作拉头缆。运输唔发达嘅年代,喺整个广东,西江、东江、北江等河流都系客运、货运嘅重要通道,广州作为珠江嘅出海口,系水运嘅中心。而今,高铁、轻轨四通八达,船运已经唔再占主流,不过“拉头缆”作为一句俗语,一直保存落来。
小到一场聚会,大到科技创新,都要靠拉头缆嘅人。能拉头缆,唔单只讲求力量,更加需要靠一种敢为人先、勇往直前嘅精神。喺人哋未有行动嘅时候,你能够睇到先机,作为第一个步入某个领域,或者从事某项工作嘅人,咁离成功就近咗一大步。广东作为改革开放嘅前沿阵地,喺好多领域都引领风气之先。“拉头缆”,已经成咗一个城市宝贵嘅精神特质。
闻歌 媒体人