(原标题:饮胜)
白话广州
“爸爸,点解人哋叫干杯,你哋饮酒就叫饮胜嘅?”喺酒席度,个细路女好奇咁问老窦。“因为我哋广州人讲究水为财, 干 字唔好听咯,所以就叫胜,意头好嘛”,个爹地好有耐性咁回答个女嘅问题。春节临近,同学、亲戚、同事聚会多咗,喺酒楼度,“饮胜”声此起彼伏。
广州人唔中意“干”、“空”呢类字,譬如猪肝就叫做猪膶,空车就叫“吉车”。有考据话,饮胜唔单只系因为吉利,旧阵时有个朝代,因为朝廷禁酒,所以民间饮酒就代称为“胜”。上世纪80年代,郑少秋仲有首歌就叫《饮胜》,唱红大江南北。南方人饮酒向来唔够北方人豪气,呢个几乎系公认嘅。呢排,有个代驾平台公布咗个《2016中国城市应酬指数报告》,据说喺全国35个主要城市利用车辆代驾嘅大数据得出嘅,广州虽然城市规模大,不过应酬指数只排到全国第五。而所谓嘅应酬,基本系指饭局、酒席嘅形式,所以广州人饮酒上嘅理性,亦可见一斑。
“饮胜”,唔单只系饮晒杯酒,仲指大家饮得欢乐、吉祥,咁先叫“胜”。既然要欢乐,就唔可以唔讲究度同量。呢排,经常见到新闻话,边度又有人因劝酒,搞到人哋饮到出咗事,而根据法律,劝酒嘅人要追究刑责。斗酒斗出大头佛,就唔叫“胜”,叫“输”先系。
闻歌 媒体人