(原标题:红蓝铅笔)
广州有句俗语,“红蓝铅笔,两头都要批”。批,即是削,佢引申出来嘅意思就系话,你哋两个都唔啱,大家都要批评。嗰日喺街度,有两个小姊妹嘈交,个妈咪就将两个都狠批一餐。个妹妹就好唔吩气,“明明系姐姐唔啱,你就两个都一齐闹”。隔离嘅婆婆就话,“就系要咁,红蓝铅笔至啱。”
呢句话,隐含嘅逻辑系,一只手掌拍唔响,闹矛盾嘅双方都有问题。譬如,如果一方肯相让一下,沟通处理嘅方式好啲,咁就唔会有火星撞地球嘅局面。尤其系细路仔,或者家庭内部嘅小矛盾,大多数都属于呢种类型。所以,好多父母或者老师,面对细路嘅纠纷,都会采取呢种方式。佢有个好处,既然两个都要批,至少系形式上系公正嘅,咁以后佢哋发生争执阵时,大多数情况下,就唔会“恶人先告状”,所以细路之间嘅矛盾,佢哋亦慢慢学会自己解决。
不过,呢种处理办法亦要睇情况而定,唔可以过于简单,否则唔单只化解唔到纠纷,仲唔令矛盾越陷越深。譬如,矛盾嘅一方确实有明显嘅错误时,如果亦系各打五十大板,显然唔会令佢认识同改正错误。所以,“红蓝铅笔”嘅处理方式,只适合于嗰啲“茶杯里嘅风波”,如果涉及原则问题,譬如安全等,就唔可以含糊。社会法治,同教育细路嘅道理一样。
闻歌 媒体人