(原标题:书店一条街)
周末行过北京路,来咗一两年冇去嘅古籍书店逛下。书店门口,刚好搞紧个老字号一条街四周年展销活动。入到书店,一种旧时风味扑面而来,除咗书系新嘅之外,书柜仲系当年嘅书柜,书画册、线装书、古籍集……相对于外边嘅墟撼,呢度格外宁静,行街嘅人逛下书店,定有一种喧嚣之后嘅惬意。
好多人都知北京路系商业步行街,但未必人人知道呢度亦系书店街。喺短短几百米就有五间,唔少仲有段古。譬如科技书店,一百几年前系商务印书馆广州嘅分馆,唔单只卖书,仲出书。联合书店就系当年中华书局分局,呢两家直到加阵仲系大名鼎鼎嘅出版社。历史记载,喺民国初年,北京路(原名永汉北路)就系出咗名嘅“书店街”,书局成行成市。后尾虽然搬迁或者执笠,不过书香传统直到今日仲传承紧。
生活需要平衡,当你行喺商业街度,喺繁华嘅叫卖声中,偶尔匿入书店,静落来翻一两页书,咁先叫享受。况且,顾客嘅需求有万千种,有书店喺商业区搭配,就好似万绿中间一两点红咁。香港铜锣湾亦有唔少知名嘅书店,譬如诚品、商务等,游人扫货定咪书,各得其乐。如今,广州最新嘅商业规划,都鼓励啲购物城至少要有一间书店,可见规划部门亦好清楚,一个商业之都,亦应该系一个文化之都。
闻歌 媒体人