(原标题:唔揾“媒人”)
有个朋友讲起,呢段时间佢嘅车刚好要年审,想喺广州搵个中介帮佢办下,费用三旧水。我话,根本冇必要,因为流程好简单,自己上网预约,一个上午就搞掂。佢一听,有道理,几日后话俾我知,原来咁简单!
广州有句俗话叫“唔做中,唔做保,唔做媒人三代好”,意思系话,中介、担保或者媒人之类嘅牵线人,经常吃力不讨好,唔系咩好行当。不过,今时今日,喺市场经济下,中介行业十分兴盛。市面上出现咗唔少中介,帮人“搞”各种各样嘅业务,大到卖车卖楼、留学移民,细到买个靓嘅QQ号或者手机号,只要你谂得出嘅,都可以搵到。有啲中介仲几赚钱。当然亦有唔少“黄牛”之类嘅违规中介,专门钻漏洞搵钱,有时候唔单只办唔好,仲耽误咗事添。
点解街坊要搵中介?除咗资源缺乏嘅原因外,好多时候无非系因为啲嘢好难搞,自己冇精力或能力去应对。而深层次嘅原因,则系以前好多部门办事流程太过复杂,街坊一头烟,唔搵人帮手,根本冇办法搞掂。不过呢几年,广州好多部门将办事流程简化,唔少业务轻松办妥,就好似刚才讲嘅车辆年审咁。家阵,互联网+盛行,通过网站或微信,只要自己资料齐备,点几下就OK,所以就冇必要再去搵“媒人”啦,呢个系时代嘅进步。
闻歌 媒体人