(原标题:广州蓝)
眨下眼,中秋就过咗,广州呢几日嘅天气真系靓爆镜,唔少街坊喺朋友圈度晒“广州蓝”:蓝天、白云、绿树同各色建筑,搞到外地嘅朋友翻白眼,话我哋拉仇恨。
好多街坊对广州天空嘅变化都好有感触。仲记得上世纪90年代阵时,我刚来广州做嘢,行下街返到屋企,都要洗下面,事关一鼻窿都系黑麻麻嘅灰尘。到咗周末,大家出城后都会深呼吸,索返几啖新鲜嘅空气。相比之下,如今广州真系“换咗个天”:数据话,今年上半年,广州环境空气质量达标天数比例系91.2%,同比增加咗5个百分点。
因为“广州蓝”嘅出现,家阵好多景点都增添咗一分吸引力。譬如“白云晚望”,十几年前大部分时间都只能望到朦胧嘅天河,如今景致明显改善,所以经常见到啲街坊攞住长枪短炮,将镜头对准城市同天空。喺市中心幽静啲嘅小区,晚上经常仲可以睇到星星,以前基本难以想象。如此种种,可见对于环境嘅变化,街坊都心知肚明。
对于政府部门来讲,市民晒“广州蓝”,既系肯定,又应该系鞭策:期待下一个十年、廿年,广州嘅天空变得比如今更加纯净,俾蓝天白云成为呢座城市嘅常态。
闻歌 媒体人