分享至
（原标题：大自然嘅“闹钟”）
白话广州 闻歌 媒体人
炎炎夏日，天光得早，好多广州人有一种天然嘅“闹钟”，就系雀仔。五六点钟，窗外边就开始吱吱喳喳，好似开早会咁。
前几年去北方，如果刚好喺秋冬季节，经常睇到嗰度光秃秃嘅树上，有一两只雀仔窦。譬如青岛，就算天寒地冻，周街都见到啲雀仔喺树上跳上跳落。当时谂，点解广州冇呢？呢两年，慢慢先察觉，原来广州街边嘅树上亦好多雀，见唔到雀窦，可能系因为树木常绿，俾浓密嘅枝叶挡住。前一排，新闻仲话，广州有位街坊出差一个月，返来后发现屋企多咗窦乌鸫，仲生咗几只蛋！嗰位街坊爱心爆棚，细心呵护窦雀，后尾乌鸫妈咪仲哺出咗几只小雀仔添。睇来，啲雀仔已经唔甘于住喺树上，仲要不时飞入寻常百姓家，刷下“存在感”。
虽然广州街头随处都可睇到雀仔，但如果要集中赏鸟，有几个地方系绝对不容错过嘅。今年早啲时候，市园林局就推荐咗海珠湿地、南沙湿地、白云山同流花湖，尤其系春天，候鸟特别多。呢几年，有啲街坊专门拍摄雀仔，佢哋通常攞住啲“长枪短炮”，喺呢啲鸟类出没嘅地点守候，有时候等半日先影到张，颇唔容易。不过，安安静静咁睇住啲雀仔喺树丫上、草地上跳上跳落，听佢哋唱支歌仔，都系一种难得嘅享受，至于照片靓唔靓，似乎已经变得唔紧要。
本文来源：信息时报
责任编辑：
王晓易_NE0011
